هضربة نسوان الفريق

اصدقاء المنتدي .. تحية ليكم كلم ... دعوني اخترق هذا المنتدي لاقدم لكم بعضا من الهضربة

الحلقة الاولي:
ست النفر وام حقين وبخيتة والروضة والسيدة ام شلوخ نسوان الفريق اتلمن بعض الضهر قالن يمشن يشربن القهوة مع ام نفلين عشان حتمشي الحج هي وراجلا ود العمدة. المهم اي واحدة شالت حاجة في يدها الشالت السكر والشالت البن والشالت الشعيرية شافن عيب انو يمشوا ويدهم فاضية. صنقرن ليك في ضل شجرة النيمة في طرف الحوش القعدت في البنبر تقلي في البن والاتكت في العنقريب وبدن الونسة...
الروضة قالت لي ام نفلين دحين يختي لوري حاج العوض سمعت قالو حاجزين فيهو لي بورسودان ومن هناك بتركبو البابور لحدي الحجاز . بس كدي النقول ليك كان غيرتو اللوري ده احسن والله شهر ما بيوصلكم ما شفتي العملا في سيرة ود حاج منصور لحدي تاني يوم ماوصلو الا قريب العصر الناس قنعت منهم وام العروس كانت حالفة الزول ده مايخش عليهم قالت خجلم مع المعازيم.
السيدة الكلام زعلا بالحيل وشافت انو الروضة قاصدها عديل بالكلام لانو حاج العوض بيقرب ليها ود خالتا ود خالة عم امها قامت طوالي قالت هووووووووووي يا الروضة مالو لوري العوض يعني كان عطل في مشوارين تلاتة خلاص بقي كعب..
انتي عايني لي المره الماشة علي الرسول دي وخافي الله..
بخيتة قالت تطفي الموضوع وعاينت لي ست النفر دحين اّاّست النفر البن ده ما تقليهو شديد. وكدي يام حقين ناوليني الصينية دي النكسر فيها الشعيرية.
ام نفلين انبسطت تب وقالت لي بخيتة النبي عليك كان تهرسيها وكان قليتيها بالسمنة بيكون كويس كدي النجيبو ليك من المتبخ
السيدة قربت راسا من ست النفر وقالت ليها واللللللللللللللللللللللللله وحياة الشيخ اب قرقاب المره دي لا عندها حج ولا حاجة شوف عيني بوبار سااااااااااكت وبعدين الفريق كلو عارفا من قامت ما خت جبهتا دي في الواطة وانا سمعت تحت تحت انها ماشة تزور عشان ربنا يفك عقرتا سبعة سنة من عرست ولي هسة ما ولدت واكان ما اخاف الكضب قالو العيب منها استغفر الله من حق الناس
بخيتة قالت ليهن مالكن يا نسوان بتوسوسو ما دخلونا معاكم وهي قايلة في سرها انهم بتكلمو عليها عشان شكلتا امس مع راجلا الحالف بالطلاق الا يتزوج عليها .
لا لا يابخيتة كنا بنقول لو كان غشينا ناس التومة وخادم الله جن معانا كان احسن اصلهن معقدات وهسي لو سمعن بينا هنا كان جن وفرجن علينا الفريق.
ست النفر ضحكت لمن قربت تقع من البنبر ومسحت دموعا بي طرف توبا وقالت ليهن هي التومة عندها طريقة مرقة وحاة ابوي السمح داك من يوم ما وقعت في الادبخانة ومرقوها لي الليلة دي ماقادرة تمشي في الشارع الشفع قدر ما يشوفها بيقفلو نخريهم ويكوركو افيييييييييييييييييييييييييييييييييييييييييي.
وقالن كده انفقعن بالضحك ....... وفجاء التومة ظهرت ليهن بي فوق الحيطة وكوركت ....................
يتبع باذن الله في الحلقة القادمة من (شمارات نسوان الفريق)